ÓSTBHAILTE
le ceapadh do Phríomhfhéile Náisiúnta na nGael,
Oireachtas na Samhna
Féile ollmhór is ea Oireachtas na Samhna a fhreastalaíonn ar Ghaeil ó na ceithre hairde. Tá pobal leanúna dílis, tiomanta ag an bhféile a fhilleann bliain i ndiaidh bliana, go minic ag tabhairt tuilleadh cairde agus gaolta leo!
Tá áit bhuan, sheasta ag Oireachtas na Samhna i bhféilire na nGael. Tosaíonn an fhéile tar éis an Luain dheiridh de mhí Dheireadh Fómhair agus leanann na himeachtaí ar aghaidh go dtí an Domhnach dar gcionn.
Is é an gealltanas a dhéanaimid i leith Oireachtas na Samhna ná gur láthair Ghaeltachta í láthair na féile pé áit sa tír a mbeidh sí ar siúl, gur Gaeilge a chloisfear ar chuile ardán agus a labhrófar ar chuile stáitse, go bhfreastalófar ar an uile aoisghrúpa, chomh fada agus is féidir linn, agus go gcuirfear fáilte agus fiche roimh taibhealaíontóirí den uile chineál, bíodh siad sean-nósach, nua-nósach nó comhaimseartha go smior.
Féile ildánach is ea Oireachtas na Samhna. Ag croílár na féile bíonn na comórtais taibhealaíona, comórtais a bhíonn eagraithe d’aoisghrúpaí éagsúla, ach timpeall orthu sin bíonn an iliomad imeachtaí eile, seisiúin cheoil agus amhránaíochta foirmiúla agus neamhfhoirmiúla, taispeántais, seimineáir, drámaí, clubanna na féile, agus lear mór imeachtaí ar an imeall.
Gné thábhachtach den fhéile is ea Aonach an Oireachtais. Is halla taispeántais atá ann le haghaidh eagraíochtaí náisiúnta, gnólachtaí agus comhlachtaí stáit a bhfuil fonn orthu caidreamh a chruthú agus a chothú le pobal na Gaeilge, eolas a roinnt maidir lena gcuid seirbhísí, earraí a dhíol agus mar sin de.
Comhpháirtithe & Urraitheoirí
Táimid faoi chomaoin ag an líon mór urraitheoirí agus comhpháirtithe sna meáin a chabhraíonn linn an fhéile mhórthaibhseach, ildánach seo, lán de bheocht agus de bhríomhaire na nGael, a leathnú amach agus rannpháirtíocht inti a spreagadh i bhfad agus i ngearr, in Éirinn & thar lear, ar na meáin éagsúla.
Ina measc ár gcomhpháirtithe tá an Roinn Turasóireachta, Cultúir, Ealaíon, Gaeltachta, Spóirt agus Meán; Foras na Gaeilge; TG4; Údarás na Gaeltachta; Coimisiún na Meán; RTÉ Raidió na Gaeltachta; BBC Thuaisceart Éireann; Telegael, Raidió na Life; Raidió Fáilte; www.tuairisc.ie; Conradh na Gaeilge; Cumann na bhFiann; Glór na nGael; Gael Linn; Gaeloideachas; an Cumann Lúthchleas Gael; an Taibhdhearc; Tuismitheoirí na Gaeltachta; an Coimisiún Eorpach; agus na céadta duine a dheonaíonn a gcuid ama agus fuinnimh go fial flaithiúil dúinn.
Má tá spéis agat tuilleadh eolais a fháil i dtaobh iarratas a dhéanamh ar an bhféile speisialta seo a óstáil i do bhaile féin seol ríomhphost, le do chuid sonraí teagmhála chuig: ceannasai@antoireachtas.ie
Is iad seo a leanas na céimeanna éagsúla a bheidh i gceist do roghnú óstbhailte:
Céim 1: Léiriú Spéise a chlárú trí ríomhphost a sheoladh chuig ceannasai@antoireachtas.ie
Céim 2: Eagrófar Seisiúin Eolais do gach dream a chláróidh léiriú spéise. Tabharfar aischothú ag gach céim den phróiseas má lorgaítear é agus tabharfar
freagraí i gcónaí ar cheisteanna i leith na féile a bheidh ag óstbhailte atá ag déanamh iarratais.
Céim 3: Beidh Iarratas Oifigiúil i bhFoirm Scríbhinn le déanamh (Ní mór iarratais i leith na bliana 2025 a bheith curtha isteach faoi 30 Samhain 2023).
Céim 4: Measfar na hiarratais, lena n-áirítear cuairt ar óstbhailte.
Céim 5: Cinneadh, Fógairt & Síniú Meamraim Chomhthuisceana.