 (1).png)
.png)
.gif)
.png)
Bhuaigh Madame Lazare le Tadhg Mac Dhonnagáin an chéad duais i gComórtas A1: Úrscéal – Ficsean Ginearálta i gComórtais Liteartha an Oireachtais sa bhliain 2020. D’fhoilsigh Barzaz é sa bhliain 2021 agus bhí sé ainmnithe ar Ghearrliosta Ghradam Uí Shúilleabháin sa bhliain 2021.
Is scríbhneoir é Tadhg Mac Dhonnagáin a bhfuil réímse leathan seánraí saothraithe aige, ina measc ficsean, neamhfhicsean, drámaíocht teilifíse agus amhráin. Is iomaí sin aitheantas atá tuillte ag a shaothar, ina measc duaiseanna Oireachtais, Irish Book Award, gradam IFTA, Gradam Leabhar Gaeilge na Bliana agus an White Raven, liosta gradamúil de litríocht na cruinne a roghnaíonn an International Children’s Library, Munich gach bliain.
Bronnadh Aitheantas Speisialta ar a úrscéal, Madame Lazare, ag Gradam Litríochta an Aontais Eorpaigh, 2022, an chéad saothar Gaeilge riamh a ainmníodh mar ionadaí na hÉireann ar an ngradam. Tá a shaothar aistrithe go forleathan san Eoraip, san Áise agus i Meiriceá Theas.
Ó bhí sí ina páiste óg, tá Levana bródúil as a dúchas Giúdach agus as na mná láidre a chuaigh roimpi. Duine acu sin í Hana Lazare, seanmháthair Levana, a theith ina cailín óg di óna tír dhúchais i dtuaisceart na hEorpa, an t-aon duine amháin dá muintir a tháinig slán ó shlad an Shoah. Ach nuair a thagann mearbhall intinne ar Hana i ndeireadh a saoil, sceitheann blúirí eolais óna béal a fhágann Levana trína chéile. Seoltar an bhean óg ar aistear a thugann uirthi gach rud a dúirt a seanmháthair riamh léi a cheistiú. De réir mar a ghluaiseann an scéal ó Pháras go dtí an Bhruiséil go hiarthar na hÉireann, druideann Levana le fíorscéal a seanmháthar agus leis an tubaiste ba chúis leis an saol rúnda atá caite ag Madame Lazare.
Suigh siar agus éist le Tadhg ag léamh blaiseadh de Madame Lazare.
Éist Siar
