Inniu (1 Samhain 2023) in Óstán Brehon, Cill Airne, Co. Chiarraí, sheol Uachtarán an Oireachtais, an Dr. Gearóid Denvir Príomhfhéile Náisiúnta na nGael, Oireachtas na Samhna 2023. Leanfaidh an fhéile ar aghaidh go dtí Dé Domhnaigh seo chugainn, 5 Samhain 2023. Tá clár spleodrach ildánach le cur os chomhair phobal na Gaeilge agus Gaeltachta i mbliana, ag áireamh: ócáid bhronnta Ghradaim Chumarsáide an Oireachtais, comórtais taibhealaíon, seimineáir, seoltaí leabhar/dlúthdhiosca, ceardlanna, clubanna na féile, seisiúin cheoil, amhránaíochta, eolais agus go leor eile.
Rinne An tOireachtas ceiliúradh ar shaothair nuascríofa Gaeilge agus bhronn Uachtarán an Oireachtais duaiseanna ar bhuaiteoirí Chomórtas Liteartha 2023, sraith comórtais a shíneann siar chomh fada le 1897 nuair a chéadbunaíodh An tOireachtas.
Bronnadh 37 duais ar fad, duaischiste iomlán de €30,000. I measc na nduaiseoirí móra bhí Colm Ó Ceallacháin ar bronnadh Buaicshaothar Próis na Bliana (urraithe ag TG4) agus & €3,000 chomh maith leis an gcéad duais sa chomórtas ÚRSCÉAL LITEARTHA agus €3,000 air dá shaothar sarmholta, Fiche. Is iad Páid Ó Neachtain & Bróna Ní Uallacháin a bhuaigh an duais don úrscéal do dhaoine óga, €2,000 dá saothar, ‘Nois Tá’s Agam agus Antain Mac Lochlainn a bhuaigh an duais €2,000 don Éanna Corr. (Tá liosta iomlán na mbuaiteoirí liteartha ar fáil anseo).
“Déanaim comhghairdeas ó chroí leis na scríbhneoirí ar fad ar bronnadh duaiseanna liteartha orthu inniu”, a dúirt Máirín Nic Dhonnchadha, Ceannasaí an Oireachtais. “Is léiriú é caighdeán na saothar ar an mborradh atá faoin scríbhneoireacht chruthaitheach i nGaeilge i measc an uile aoisghrúpa.”
I measc na mórócáidí eile a bheidh ar siúl inniu tá Ócáid Bhronnta Ghradaim Chumarsáide an Oireachtais 2023 san INEC, Cill Airne, Co. Chiarraí. Beidh clúdach cuimsitheach á dhéanamh ar imeachtaí uile na féile ar RTÉ Raidió na Gaeltachta, BBC Gaeilge, TG4, Raidió na Life, Raidió Fáilte, Tuairisc.ie, www.tg4.ie agus ar na meáin shóisialta.
Tá gach eolas maidir le himeachtaí uile na féile ar fáil ar láithreán gréasáin an Oireachtais, www.antoireachtas.ie nó ar aip na féile ón Appstore nó Google Playstore.
TUILLEADH EOLAIS: Síle Mhic Dhonnacha | 00353 87 946 3405 | sile@antoireachtas.ie