D’fhógair muid, i gcomhpháirt le Foras na Gaeilge, beo ar RTÉ Raidió na Gaeltachta Dé Máirt, 15 Lúnasa 2023 na leabhair atá ainmnithe ar na gearrliostaí do Gradam Uí Shúilleabháin (Leabhar na Bliana don Léitheoir Fásta), Gradam Réics Carló (Leabhar na Bliana don Léitheoir Óg), agus Gradam de Bhaldraithe (Leabhar na Bliana do shaothar aistrithe go Gaeilge ó theanga eile).
Tá fiche (20) leabhar ainmnithe ar ghearrliostaí na bliana seo - seacht (7) leabhar ar ghearrliosta Ghradam Uí Shúilleabháin, sé (6) leabhar ar ghearrliosta Ghradam de Bhaldraithe agus seacht (7) leabhar ar ghearrliosta Ghradam Réics Carló.
Bhain 9 dTeach Foilsitheoireachta éagsúil gearrliostaí na bliana amach. Is iad na tithe foilsitheoireachta atá i gceist ná: An tSnáthaid Mhór; Barzaz; Cló Iar-Chonnacht; Cló Léann na Gaeilge (CLÓ); Dalen Éireann; Futa Fata; Leabhar Breac; LeabhairCOMHAR agus Picnic Press. Tá liosta iomlán de na leabhair atá gearrliostaithe ar fáil thíos.
Marc aitheantais ar scoth an chaighdeáin cruthaitheachta in earnáil na foilsitheoireachta Gaeilge iad na gradaim bhliantúla seo. Is gradaim iad seo atá dírithe go príomha ar fhoilsitheoirí leabhar Gaeilge ach bronnfar duais ar údar na nduaisiarrachtaí agus i gcás Gradam Réics Carló, ar ealaíontóir an leabhair chomh maith. Gabhann duaischiste de €17,000 leis an trí ghradam.
Fógrófar na buaiteoirí ag searmanas speisialta ag tús mhí Dheireadh Fómhair 2023.
